Nadama Hausa Novels Complete

Table of Contents

NADAMA 1-2-& 3

Wannan labarin sadaukarwa ne ga yayata margayiya

Fatima (Allah Ya lullube kabarinki Fatima da rahamarSa.

Amin)

Shimfida.

Birnin Shehu.

A bisa wani titi cikin wata mota kirar Ferrari launin toka,

wasu abokai ne zaune suna tafiya sun yi shiru sai ka ce

wadanda ruwa ya cinye. Dayan wanda ke tuka motar da

ka kalli fuskarsa za ka fahimci ya na cikin damuwa,

dayan kuma wanda yake zaune a kujerar mai zaman

banza, fuskarsa ba yabo ba fallasa, akalla sun shafe

sama da mintina goma sha biyar ba wanda ya ce wa

dan uwansa kala. A wannan yanayin suka karya kwanar

wata unguwa ta masu hannu da shuni, daidai wani

kayataccen gida suka gurfanar da motar tasu, dayan

wanda yake janye da motar ya juyo ya kalli abokin nasa

cikin damuwa ya ce “ka tabbata nan ne gidan kuwa

Aliyu?” Wanda ke amsa sunan na Aliyu ya dago kai ya

ce “haka nake zato ba wai na tabbata ba ne, amma me

zai hana mu tambaya?” Suka fito daga motar suka yi

tsaye suna rabon ido ko za su samu wanda za su

tambaya, sun shafe kusan mintina biyar a hakan kafin

su hango wani yaro ya fito daga wani gida makwafcin

gidan da suke tsaye a kofarsa, cike da zumudi wanda

yake cikin damuwar yai kiran sa.

“Don Allah nan ne gidansu Rukayya Abubakar Rabah?”

ya tambayi yaron bayan ya karaso inda suke, yaron ya

amsa da “eh nan ne”.

“Don Allah ka kira mana ita mana” yaron yai jim! Kamar

ba zai je ba kuma dai sai ya kunna kai cikin gidan, cikin

dakikun da ba za su haura sittin ba yaron ya dawo “wai

an ce waye?” “Je ka ce Zayyad ne”. Yaron ya sake

juyawa ya koma cikin gidan.

Cikin mintunan da ba za su haura bakwai ba sai ga

wata matashiyar budurwa ta fito daga cikin gidan. Cikin

sanyin jiki ta karaso inda suke kallo daya za ka yi wa

fuskarta ka fahimci cewar tana cike da alhini.

“Ina wuninku?” ta fada a sanyaye, Suka amsa a kusan

tare da “lafiya kalau ya gida?” Zayyad bai ko jira

amsawar ta ba ya ci gaba da magana a kokarinsa na

son gabatar da dalilin zuwan su wajenta “Rukayya wani

taimako ne na zo ki min please”.

Ya dan tsahirta sannan ya ci gaba “na daina ganin

kawarki Zeenat ne kwana biyu, kuma a zahirin gaskiya

ina son ganin ta saboda in ba ta hakuri a kan abubuwan

da na yi mata a baya”.

Ya dan numfasa domin ba ta dama ko za ta ce wani

abu ganin ta yi shiru sai ya ci gaba “Lambar wayarta

nake so ki ba ni, ko kuma ki kwatanta min gidansu

please”.

Shiru ta yi kamar ba za ta ce komai ba can! Kuma sai

ta ja dogon numfashi.

“Ka yi hakuri Zayyad…….”

Maganar ta makale a fatar bakinta ta kasa karasawa.

A dan sanyaye ya matso kusa gare ta “Me ya faru?

Daure fada min mana” ya fada cikin kagauta da son jin

abin da zai fito bakinta.

Cikin murya mai kama da kuka ta ce “Allah Ya yi wa

Zeenat cikawa, yau sati hudu kenan”.

Kamar shigar alburushi a kahon zuciya haka ya ji

zancen nata, bai san lokacin da ya dafe kai ya sunkuya

kasa ba cikin sambatu ya rika fadin “Haba Zeenat kar ki

min haka mana ya za ki tafi ki bar ni? Me yasa ba ki

tashi tafiya ba sai da na fara son ki? Don Allah ki dawo,

Wallahi! In ba ke, ba zan iya rayuwa ba”.

Ya shafe sama da mintina takwas cikin wannan yanayi,

sai da Aliyu ya kama shi ya saka shi mota ya zaunar

da shi a kujerar mai zaman banza shi kuwa ya zauna a

kujerar direba, ya tayar da motar suka bar layin.

Har suka bar layin Zayyad bai daina sambatu ba. Aliyu

ya juyo ya kalle shi cike da tausayi ya ce “Addu’a ya

kamata ka yi mata Zayyad ba kuka ba, kukan nan da

kai har ita ba zai amfane ku da komai ba, ba dai zai sa

ta dawo ba, haka kuma ba zai mata amfani a can ba”.

“Ka bar ni kawai in yi kuka Aliyu ko zan ji sanyi a raina,

meye amfanin rayuwata? Ai ba abin da ya kamace ni a

yanzu sai kuka, tun da na riga na rasa wacce ke so na

fiye da rayuwarta, babban bakin cikina na kasa amsa

mata son da take min in faranta mata rai, ga shi yanzu

damar yin haka ta kubuce min” ya ida fashe wa da kuka

cikin murya mai karfi.

Aliyu ya dafa kafadarsa cikin yanayin rarrashi ya ce “ka

daina kuka abokina ba fa kuka ne mafita gare ka ba,

dama abin da na yi ta nuna maka tun farko ka kasa

fahimta kenan, yarinyar nan ta so ka irin son da ko a

labaran soyayya ban taba jin an yi ma wani irin sa ba,

amma ka watsa mata kasa a ido, duk lokacin da na

fada maka gaskiya a kan ka daina dizga ta, ko da ba za

ka so ta ba, idan ka nuna mata kulawa za ka rage

mata dafin dake zuciyarta sai ka yi biris da maganata

har laifina kake gani.

Ba na raba daya biyu bakin cikinka ne ya yi sanadiyar

mutuwarta, na tabbata alhakinta ma ba zai bar ka ba,

saboda haka addu’a ya kamata ka rika yi mata, ka

kuma ci gaba da Istigifari ko Allah Zai yafe ma”.

Kwarai maganar abokin nasa ta yi tasiri a zuciyarsa,

tabbas ya san ya zalince ta, ga shi lokacin da ya gano

hakan ba ta raye bare ya nemi afuwarta, yanzu ina zai

kai alhakinta da ke bisa kansa? NADAMA mai tarin

yawa ta zo masa, ya ji gabadaya duniyar ta yi masa

kunci. Sannu a hankali zuciyarsa ta fara hasko masa

abubuwan da suka yi ta faruwa a cikin shekaru biyun da

suka gabata.

September 2010.

A cikin wani makeken dakin taro (hall), cikin wata

makekiyar otal (hotel), wasu masoya masu shirin zama

ma’aurata ne ke gudanar da bikin murnar aurensu, bikin

sai gudana yake a tsare cikin ban sha’awa, ga alama

bikin ya na nisahadantar da mahalartansa, idan ka yi la’

akari da yadda fuskar kowa take cike da murmushi.

Bayan raye-raye daga wasu mawaka sai mai gabatarwa

ya karbi abin maganar ya fara magana

“Ah! Ba tare da bata lokaci ba yanzu za mu kira babban

abokin ango, domin mu ji takaitaccen tarihin ango daga

bakinsa. Zayyad in ka na kusa muna bukatar ka a nan

domin mu ji waye ango daga bakinka”.

Wani kyakkawan saurayi dogo, wankan tarwada sanye

cikin farar shadda mai surfani launin siminti, ya sanya

takalma, su ma launin siminti, hular da ya sanya ma

launin siminti ce, ya adana idanuwansa da wani

madaidaicin gilashi fari, daure a madaidaicin hannunsa

agogon fata ne launin siminti. wankan ya yi mutukar

fitowa da kyawun surarsa. Ya taso cikin tafiyar kasaita

ya karbi abin maganar ya fara jawabinsa.

Hakika ba ‘yan mata ba hatta samarin dake wurin sai

da saurayin ya birge su. ‘Yan mata da yawa ya tafi da

imaninsu yayin da wasu suka ci buri a kansa.

Cikin tattausar murya mai cike da dadin sauraro da

kuma gwaninta ya rika kwararo tarihin angon. Da ya

kammala gabadaya wurin ya dau tafi saboda ya gama

birge kowa. Ya mika abin maganar hannun mai

gabatarwar ya sake juyowa cikin tafiyarsa ta kasaita ya

nufi kujerun baya ya kadaice kansa shi kadai ya ci gaba

da kallon tsare-tsaren bikin. Haka yake dama shi bai

cika son shiga jama’a ba, mutane da yawa su kan yi wa

halayyar tasa mummunar fahimta ta hanyar suffanta

shi da mutum mai girman kai da ji-ji da kai, sai dai a

zahirin gaskia ga duk wanda ya fahimce shi zai

tabbatar da duka wadannan halayen ba shi da su,

kawai dai za a iya kiransa da miskilin mutum mara son

hayaniya.

Daga nesa ya na iya hango lokacin da wata santaleliyar

budurwa ta mike daga inda ta ke zaune ta nufo wurin

da yake zaune, hakika yarinyar ta birge shi, domin ta

mallaki duk wani abu da yake so a wurin ‘ya mace, baka

ce doguwa, siririya, sai dai bakin nata mai sheki ne,

kirar jikinta kuwa irin wannan ce da samari ke kira da

coca-cola shape, ta na da dara-daran idanuwa, masu

sanya zuciyar duk wanda aka yiwa fari da su suma na

wucin gadi, bakinta kuwa madaidaici ne dauke da

tausasan labba masu kauri, fuskarta doguwa ce,

habarta ma haka. Ji ya yi kamar ya tare ta idan ta

karaso, amma kuma miskilancinsa sai ya motsa ya ji ba

zai iya yin hakan ba, ya dauka za ta zaga ne ta fita a

hall din amma ga mamakinsa ta na karasowa in da yake

sai ya ga ta janyo kujera kusa da shi ta zauna ya

zamana suna fuskantar juna shi da ita, wani murmushi

mai rikatar da kwakwalwar duk saurayin da aka jefa da

shi ta jefa masa sannan ta ce “Sannunka” cikin izza ya

amsa mata

“Yauwa sannunki”

Ta sake cewa “Sunana Zeenat, na ga ka dawo baya ka

zauna kai kadai shi ne na ga bai kamata babban abokin

ango a ce ya zauna baya kuma shi kadai ba don haka

ne na ce bari in zo in taya ka hira, Allah Ya sa dai ban

yi laifi ba?”

Haushin ta ne ya kama shi, kamar ya rufe ta da duka.

Dama hangen kitse ne wai ashe ya yi wa rogo? A

tsarinsa ya fi son mace mai aji ko da kuwa ba ta da

kyau, amma wannan ga ta kyakkyawa ajin farko, ta

kasa rike ajinta, mintina kadan da ya hango tahowar ta,

zuciyarsa makare take da muradin mallakarta, amma

yanzu sai ya nemi muradin a zuciyarsa ya rasa. Danne

abin da yake ji a zuciyarsa ya yi ya ce mata “kar ki

damu ba ki yi laifi ba”.

Jin ya ce haka sai ta ci gaba da jan sa da hira “ba ka

fada min sunanka ba ga shi ni na fada maka nawa”

“Zayyad” ya fada kai tsaye. Fari ta yi da idanuwanta

sannan ta ce “Wow! Suna mai dadi”

“na gode” ya sake cewa da

Usman Auwalu zng:

NADAMA… 2

Cikin wata irin murya ta jan hankali ta sake cewa

“Turancinka ya birge ni, a ina kake karatu ne?” Cikin

kosawa da tambayoyin nata ya ce “Usman Danfodio

University, ina karantar kimiyar siyasa ne (Political

Science) UG 3”.

Ya fada mata har abinda ba ta tambaya ba ne saboda

ya san za ta tambaya, shi kuwa duk ya kosa ta daga ta

bashi guri.

Ya zata hirar za ta tsaya a nan amma kuma sai ya ji ta

sake cewa “kawo wayarka in saka ma lambata, ina so

mu rika gaisawa”. Hannu ya saka a aljihu ba tare da

gardama ba ya dauko wayarsa kirar BlackBerry Punch

ya mika mata, da hanzarinta ta karba ta saka lambar ta

kira kanta sannan ta mika masa.

Mikewa ya yi daga kujerar fuska a yamutse ya ce mata

“i have something to do outside (Ina da abin da zan yi a

waje)”. ba tare da ya jira me za ta ce ba ya fice daga

hall din.

Murmushi ta yi tare da fadin “Ok till we met again (to

sai mun sake haduwa)”.

A gajiye Zayyad ya koma gida saboda haka, da isar sa

katifa kawai ya nema ya kwanta don ya huce gajiyar da

ya debo wajen biki, bai jima a kwancen ba ya ji rurin

wayarsa alamar shigowar sako, ya so ya kyale sakon

har ajima ya duba saboda rubdugun da gajiyar ta yi wa

gabobin jikinsa, sai kuma ya mike ya dauko wayar bisa

tunanin cewar sakon zai iya kasancewa Urgent (na

gaggawa) ya na dubawa ya ga wata bakuwar lamba ce

ta turo sakon, sai ya bude ya fara karantawa kamar

haka:

“Assalam Zayyad ya ka ke? Ba sai na tambaye ka ba na

san gajiyar biki baibaye take da kai, saboda haka ne na

ga ya dace sakon ban gajiya ta ya riske ka a daidai

wannan lokacin. Ka huta lafiya.

Zeenat.”

Har ya gama karanta sakon bai fahimci ko sakon waye

ba, sai a karshe da ya ga sunan Zeenat sannan fa ya

tuna da dazu wurin bikin ya hadu da wata har ya ba ta

lambarsa.

“Wai wannan wace irin mace ce haka, sai kokarin cuso

kanta take wurin saurayi ba ta ko jin kunya, ba ta ko

damuwa da zubar da ajin da take” ya ja tsaki ya ajiye

wayar ya koma yai kwanciyarsa.

Washe gari ma ko da ya farka daga bacci ya tarar da

sakonta, bayan ya karanta tsaki ya yi ya goge.

Haka sakuna, da kiraye-kirayen wayarta suka ci gaba da

zarya a wayarsa, ta na nuna masa kauna, gogan ko a

jikinsa, ganin ya ki ba ta kulawa sai ta shiga tunanin ko

bai fahimci manufarta ba ne, hakan ya sa ta fitowa

baro-baro ta fada masa ita fa son sa take yi, hakan da

ta fada masa shi ne ya kara cusa jin haushinta cikin

zuciyarsa, kiran ta ya yi a waya tana dagawa ya ce

“yanzu ke don Allah ko kunya ba za ki ji ba ki buda baki

ki ce wai ki na so na? To ya isa haka ki fice min a ido

or else i will humiliate you”. Bai tsaya sauraron amsar

da za fada masa ba ya kashe wayar. Ta sake kiran sa

ya ki dagawa don haka sai ta turo masa sakon kar ta

kwana.

“Haba Zayyad me ye aibu a cikin bayyana soyayyata a

gare ka, ka fahimce ni Wallahi ina mutukar son ka shi

ya sa na kasa danne abin a zuciyata”.

Duk lokacin da ta turo masa sako ko ta kira shi sai ya

ji kamar ya shake wuyanta ta mutu a huta, ya sha fada

mata maganganu masu zafi da tozarci, idan ta kira shi,

duk don ta daina son sa amma kamar hura wutar son

nasa yake yi a cikin zuciyarta. Kullum sai dai ta yi

murmushi ta ce “meye laifina don na ce ina sonka

Zayyad, hakika babu macen da ba za ta yi alfaharin

mallakarka a matsayin masoyi ba, ka ga kuwa don ni na

fitar da maitata fili bai kamata ka ga laifina ba”.

Daga karshe da ya fahimci ba za ta daina damuwarsa

ba ya yanke shawarar sauya layin wayarsa. Hakan

kuwa ya yi. Sauya layin da ya yi ya huta da

damuwarta, har ya fara tunanin cewa ya yada kwalllon

mangwaro yanzu zai huta da kuda Ashe yanzu ma

kudan suka fara bin sa.

Bayan wata daya da wasu ‘yan kwanaki Zayyad ya na

zaune a kofar gidansu, shi da abokinsa Aliyu suna hira,

wata mota kirar Toyota Yaris launin bula mai duhu, ta

yi fakin kofar gidan nasu, wasu kyawawan ‘yan mata

biyu suka fito daga cikin motar, har za su wuce cikin

gidan, sai ya ga dayar ta nuno su, sai kuma ya ga sun

nufo inda suke, sai da suka kusanto sai ya fahimci

Zeenat ce da wata wacce yake zaton kawarta ce, shi

har ya manta da ita, sai yanzu da ya ganta ya tuna da

ita, da fara’arta ta karaso inda suke, yayin da shi kuwa

ya daure fuska kamar wanda aka aiko wa da sakon

mutuwa. Cikin salon jan hankali ta ce “sannunku! Dama

Zayyad nan ne gidanku? Lallai yau a sa’a na fito”. Cikin

tsananin bacin rai ya daka mata tsawa “wai ke wace

irin ballagaza ce, me kuma kika zo yi gidanmu?”.

Idan har ta ji ciwon tsawar da yai mata da kuma kiran

ta ballagaza da ya yi, to ba ta nuna a fuskarta ba,

murmushi ta yi sannan ta ce “Ballaganzacin me na yi

Zayyad? Laifi ne zuwa gidan naku? Na rako kawata

Rukayya ne, ban ko san nan ne gidan naku ba sai da na

ganka a zaune, na ga bai kamata na wuce ba mu gaisa

ba, meye laifi a cikin yin hakan?” Ta karashe maganarta

da yin tambaya.

A harzuke ya ci gaba da fadin “sai kokarin cusa min

kanki kike ta yi, na yi ta maki hannunki mai sanda kin

ki, ki fahimta, na fahimci ba kya fahimtar yaren kawaici,

dole sai na maki baro-baro sannan za ki fahimta. Ba na

sonki, ko so dole ne? Zai fi kyau ki yi gaggawar taka

wa wawiyar zuciyarki birki tun ba ta kai ki ga yin dana

sani ba”.

Aliyu da ke zaune yana saurarar abinda ke faruwa ya

soke kansa kasa cikin jin haushin abokin nasa. Ita kuwa

Zeenat murmusawa ta sake yi sannan ta ce “To meye

aibu don na ce ina sonka Zayyad, ka sani ba ni na saka

wa kaina sonka ba, da ina da hali da na hana sonka

shiga cikin zuciyata, shi so yana Shiga zuciya ne ba tare

da shawartar zuciyar da zai shiga ba, ya kan yi shigar

ba zata ne kamar yanda yai wa tawa zuciyar. Ba zan ga

laifinka ba duk abinda ka yi min, sai dai ka sani ba zan

iya hana zuciyata sonka ba, sai dai duk abinda zaka yi

min ka yi min”. Kawar tata dake tsaye tun zuwan su

wurin ba ta ce uffan ba, ita ce ta ja hannunta suka yi

cikin gidan.

Bayan shigewar su Aliyu ya dago fuska cikin fushi ya ce

“Haba Zayyad! Wannan wace irin rayuwa ce haka, don

ta ce ta na sonka, bai kamata ta fuskanci wannan

tozarci daga gare ka ba, samari nawa ne a garin nan ba

ta ce ta na son kowa ba sai kai, ai ko da wasa mutum

ya ce ya na sonka ya gama maka komai. Sannan da

ganinta ba ka bukatar a tsaya fada maka ka san ba wai

ta rasa masu sonta ba ne, shi yasa ta ce ta na sonka”.

Zayyad shi ma a kufule ya ce da Aliyu “idan har ta na

da masoyan me yasa ba ta tsaya wurinsu ba, kuma

tozarcin ai ita ta ja wa kanta, don na yi ta kokarin zille

mata, ita ce ke dada manne min, in ban da ballagazanci

me zai sa ta biyo ni har gida?”

Cike da takaici Aliyu ya sake cewa “kar fa ka yi amfani

da damar da kake da ita a kan yarinyar nan, ganin ta na

tsananin sonka ka ci gaba da wulakanta ta, ka sani

Allan da Ya saka mata son ka a zuciyarta, ba tare da

shawartar ta ba kai ma Zai iya jarabtar ka da son ta

fiye da yadda take son ka a yanzu………..

Zayyad ya tari numfashinsa “God forbid, Aliyu ya

kamata ka daina shiga gonata, yarinyar nan in ma ta

biya ka ne ka yi mata kamfen, ka sani kamfenka bai

samu karbuwa ba, sai in ce Allah raka taki gona”.

Aliyu ya yi murmushin takaici sannan ya ce ” in ma dai

biya na ta yi in mata kamfen, ka sani ina yin sa ne a

inda ya kamata, amma dai ka sani ya kamata ka yi

tunani”.

[10:42AM, 12/26/2015] Usman Auwalu zng: NADAMA… 3

“Ka ga Aliyu mu bar maganar haka please”. Zayyad ya

fada a kufule

“Tun da ba ka son gaskiya you must said so, ai kamata

ma ya yi ka yi wa Allah godiya da har ya cusa son ka a

cikin zuciyar wannan kyakkyawa yarinya”. Shi ma Aliyun

ya mayar masa a kufule.

“Ba za ka bar maganar ba kenan” Zayyad ya fada tare

da daga masa hannu.

“Eh ba zan daina ba, meye amfanin abotakarmu in dai

har zan ga ka kaucewa hanya ba fada maka gaskiya

ba”.

Mikiwa tsaye Zayyad ya yi ya fara tafiya “ba kuwa da ni

za ka ci gaba da yin maganar ba.

Sororo Aliyu ya yi ya na mamakin abokin nasa saboda

ya fada masa gaskiya shi ne ya ta shi ya ba shi wuri.

Girgiza kai ya yi kana ya shige motarsa ya nufi gida.

Shi kuwa Zayyad don ma kar ya kara sake haduwa da

ita unguwar ya bari gabadaya sai dare ya dawo gida.

BAYAN WASU KWANAKI

Cike da annushuwa, da jin dadi yake jan motar, za ka

iya fahimtar haka ne ta la’akari da yanda yake ta faman

murmushi shi kadai tare da kada kansa kamar wani

kadangare.

Daga Unguwar su Aliyu yake bayan sun gama kallon

kwallo shi ne ya nufo gida,

Farin cikin nasa bai rasa nasaba da cinye Real Madrid

din da Bercelona ta yi 3-0, hadi kuma da sautin wakar

Aminu Dumbulum mai suna “Sauda’i” dake ratsa dodon

kunnuwansa, yana cikin saurarar wakar ne aka zo daidai

wani baiti da yake cewa

“Wallahi So wani kaya ne

bai daukuwa idan ba a shirya ba”.

Ya girgiza kai cikin gamsuwa da abinda mawakin ya ce,

tare da cewa “Haka yake Dumbulum”.

A haka ya karyo kwanar layinsu ya iso kofar gidan nasu

ya yi ham (horn) maigadi ya zo ya bude masa ya shige,

ya tsugunnar da motarsa a inda ya saba tsugunnar da

ita, har zai wuce kuryar gidan sai hankalinsa ya kai kan

wata bakuwar mota dake tsugunne kusa da inda ya

ajiye tasa, tabbas ya san mai motar, sai dai kuma ya

kasa tuna inda ya san mai motar. A haka ya shige

kuryar gidan nasu ya na so ya tuno inda ya san mai

motar amma kuma ya kasa tunawa.

Ga mamakinsa ya na isa cikin farfajiyar gidan sai ya

tarar da Zeenat zaune ta dage sai wanke-wanke take yi

cikin gidan nasu. Da fara’arta ta gaishe shi “Sannu da

zuwa yaya Zayyad”. bai amsa ba sai ma harara da ya

bi ta da ita, sannan ya wuce dakin mahaifiyarsa, bayan

ya shiga ya durkusa ya gaishe ta, ta amsa cikin fara’a,

har zai yi waje sai ya ji ta ce “Surukata kuwa na nan ba

ta tafi ba”.

Cikin rashin fahimta Zayyad ya juyo ya ce “wace

surukarki hajiya?”

“Zeenat mana ko ba ka ganta ba? Gaskiya ka yi sa’a,

kyakkyawar yarinya da ita, ga ta da kirki, duk ta zo

gidan nan ita ke yin duk aikace-aikacen gidan nan, duk

yanda na yi kokarin hana ta sai ta yi, har wanki take

min, na yi ta nuna mata ta bari tunda ga masu aiki nan

sai su yi, amma ta ki dainawa. Tun ma ba ku yi aure ba

kenan, to ina ga kun yi auren. Yarinyar kirki Allah Ya yi

mata albarka Ya kuma nuna min an daura maku aure

tare”. Mahaifiyar tasa ta fada cikin annushuwa.

Shiru kawai ya yi tare da soke kansa kasa “wato dama

ta saba zuwa gidan na su kenan ta na kamun kafa, har

ta siye soyayyar mahaifiyarsa, lallai duk inda ake neman

ballagazar mace yarinyar nan ta wuce nan, tabbas sai

ya yi da gaske sannan zai fincike ta daga jikinsa. Ya

fada a ransa, tare da afkawa kogin tunanin ina zai samu

mafita. Cikin sanyin jiki ya fice daga dakin ya nufi nasa

daki.

Sansanyar iskar dake busowa a hankali sakamakon

bishiyoyi dake kada rassansu cikin nutsuwa da

kwanciyar hankali, hade da lumshewar da garin ya yi ba

karamin taimakawa ya yi wurin ba wa jama’a lasisin

yawo cikin garin, tare da cire fargabar dake zukatansu

na barazanar da suke fuskanta daga zafin rana dake

shirin tasafa kwakwalwar duk wanda ya yi yunkurin fita

cikin ranar da nufin magance wasu matsalolinsa.

Daga cikin wadanda wannan yanayin ya ba wa lasisin

fita har da Zayyad da Aliyu, lasisin da suka samu ne ya

basu damar shiga kasuwa don sayen kayan bukatun

rayuwar yau da kullum.

Sun fito cikin wani shagon siyar da agogo kenan sai

suka yi kicibis da Zeenat, yau ma tare suke da kawarta

Rukayya da kuma wata wacce bai san ko wace ce ba.

Zayyad na ganinta ya yi saurin kawar da kansa kamar

bai gan su ba, ita kuma ganin su da ta yi sai farin

cikinta ya karu, cikin nuna kulawa ta karaso inda suke,

ta gaishe su, kawarta Rukayya da dayar ma haka. Aliyu

ya amsa cikin sakin fuska, Zayyad ko kallon arziki bai

mu su ba bare su samu arzikin amsa musu gaisuwar.

Idan ta ji zafin hakan to ba ta nuna A fuskarta ba sai

ma fara’arta da ta karu ta ce masa “Zayyad ina magana

ka kyale ni, ko na yi ma laifi ne?”.

Abinda kawai ya zo ran Zayyad shi ne, yanzu ne

Karin wasu littafai da zaku so

haka maimakon ya amsa mata sai kawai ya daga

hannu ya wanke ta da mari, ji kake Tass!! Karar marin

ya yi sanadiyar janyo hankalin mutanen da ke wurin,

kowa ya sako musu na mujiya yana kokarin ya fahimci

me ke faruwa ganin haka sai ya shiga zuba mata rashin

mutunci son ransa, cikin karaji yake cewa “Na ce ba na

son ki, ana so dole ne? kin nace min sai ka ce cingam,

Wallahi idan ba ki kyale ni ba, sai na shuka maki rashin

mutunci, ballagaza kawai mara aji”.

Lokaci daya mamaki ya ziyarci zukatan wasu daga

jama’ar da suka zubo musu na mujiyar, ganin yadda

ake yarfa tsaleliyar budurwa irin Zeenat cikin kasuwa,

wasu kuwa tausayinta ne ya kama su, watakila sun

tausaya mata ne da suka fahimci ta na cikin koshin

wahala ne (son ma so wani) yayin da kuma wasu

haushinta ya kama su tare da jin Zayyad ya birge su.

Zeenat ta dago kai dafe da kunci ta ce “meye laifina

Zayyad, saboda na ce ina sonka ne ka mare ni, haba!

Zayyad ashe so zai iya zama laifi? Ba zan ga laifinka

ba, amma ka sani da ina da ikon tankwara zuciyata ta

daina son ka da tuni na yi hakan, amma zan ci gaba da

rokon Allah akan ya cire min sonka a cikin zuciyata in

hakan shi ya fi zama alkhari.

Zayyad bai ko tsaya saurarar abinda take fada ba ya sa

kai ya wucewarsa, Aliyu kuwa sai ya tsaya yana

rarrashinta. Cikin tausayawa da kuma jin haushin

abokin nasa.

A mota Aliyu ya taradda Zayyad ya na jiransa ya bude

motar ya shiga sannan ya juyo ya kalli Zayyad ransa

bace ya ce masa

“Anya ka na da imani Zayyad?

Shin ka san tarin kunya da kawaicin da mata suke da

shi? Amma duk ta ajiye su gefe ta fada maka ta na son

ka?

Wai kuwa ka san yanda zafin so yake a zuciyar wanda

masoyinsa ya ki amsa tayin soyayyarsa?

Ka kuwa san yanda dafin so yake hana zuciyar masoyi

sukuni?

Kana kuwa da masaniyar yanda gubar so ke cin

zukatan masoya ta hana su runtsawa a darare

barkatai?

Ka na so ka ce da ni ba ka san yanda Zuciyar masoyi

ke kuntatuwa da kewar masoyinta a lokacin da yai

mata nisa ba?

Haba Zayyad ba za ka bar yarinyar nan da duk

wadannan nau’ukan azabtarwa da ciwon sonka ke mata

ba sai ka hada mata da tozarci irin wannan? Wallahi ina

jiye maka tsoron ranar da alhakinta zai kama ka.”

Zayyad ya kalle shi cikin rashin damuwa ya ce

“wadannan nau’ukan azabtarwa kuma ai kai ka san da

su kai da kake yin soyayyar ni da ba na yi ta ya ya zan

sani, ni dai abin da na sani kawai mafita ce na samar

wa kaina. Saboda bacin rai da takaicin abokin nasa

Aliyu shiru ya yi bai kara ce masa uffan ba har suka isa

gida a haka suka rabu ko sallama ba su yi ba

Whatapps

07066055575

Muna dauke da Littafan marubutan Hausa…

Name:	[Nadama Hausa Novels Complete]
File Type:	Download Novels as .TXT .PDF .DOC (WPS) .HTML
Uploaded By:	www.mynovels.com.ng
Category:	Hausa Novels Documents
Tags:	#Hausa Novels Documents #Hausa Novels Books Complete Hausa Novels #Hausa Novels #Hausa Novel #Romantic Hausa Novels #Sabbin littafan hausa
Novel Price:	Free
Last Modified:	October, 2022

Nadama Hausa Novels Complete